Deep bedreuf...
Deep bedreuf vernome weej van ’t onverwachte haer gaon van ós ierelid en ózze vastelaovesvrind John Leenders.
John waas vanaaf ’t begin van ós gezelschap mier as aktief betrokke beej de veurtgang van ós vereiniging. In 1982 ging hae De Vaegers veur in de Venlose vastelaovend as prins John II. In de jaore daonao bewees John 'n mier as bizondere Vaeger te zien, 'ne man wao op ós gezelschap in goje en zwaore tieje op kós bouwe. Genne Vaeger vervölde zoeë vuul verscheijene take en funksies as John.
John waas ózze twiejde Vors Vaeger, jaorelangk joeksig lid van de Raod van Elf, ós besteurslid veur de Technische Kemmissie, penningmeister, drievende krach achter de Barkemmissie en jaorelange veurzitter. Veur al det werk woort hae in 2004 beneump wies ierelid van VG De Vaegers.
Ouk naodet hae aafscheid had genome van zien offisjiële funksies bleef John 'n betrókke lid beej de vereiniging dae mit zienen eige humor kós relativere as det nuuedig waas. En op wae we nog altied koste raekene as d’r gewerk meus waere um de kas van De Vaegers te spekke.
As ierelid waas John veur twieë waeke truuk nog aanwezig beej ’t intern veurstelle van ózze niejen hoeëgheid. Noow mótte weej de Vastelaovend in zonder um. Verdreetig, aevel ouk mit werme en dankbare geveules veur waat we allemaol mit John hebbe meuge meimake dinke we aan John.
Weej winse Jeannette, Martijn en de femilie Leenders huul vuul sterkte mit dit groeëte verlees.
VG De Vaegers
